Klám sýnir sjaldnast virðingu og jafnræði. Hvað þá sýnir klám væntumþykju og aðdáun, forleik, gælur, kúr og nánd sem alla jafna tengist raunverulegu kynlífi. Mun fremur fléttar klámið kynlífsathafnir saman við valdníðslu og niðurlægingu, og ógreinir mörkin á milli kynlífs og ofbeldis.

Samþykki er sjaldan að sjá í klámi, þátttakendur gera oftast það sem þeir vilja við hinn aðilann án umræðu.

Áberandi þema í miklum meirihluta klámefnis er einhvers konar ofbeldisfull eða lítilsvirðandi hegðun (iðulega karlmanns gagnvart konu) og oft á þann máta að þolandinn er sýndur njóta ofbeldisins. Klám sýnir ekki kynferðisofbeldi eins og það er í raunveruleikanum með ótta, sársauka og afleiðingum fyrir þolandann, heldur er það fléttað saman við kynferðisleg viðbrögð.

Rannsóknir hafa sýnt að reglulegir neytendur kláms eru líklegri til að finnast spennandi að sýna valdaójafnvægi í kynlífi; svo sem að rífa í hár, rassskella, þröngva andliti harkalega að kynfærum, slá eða kyrkja bólfélaga sinn. Mörkin verða óljós, samskiptin óskýr og líkurnar á kynferðisofbeldi aukast.

Fordómar, blætisvæðing og valdníðsla á manneskjum út frá t.d. kynímynd, kynhneigð eða kynþætti er algeng í klámi. Hvers kyns sifjaspellsatriði eru með þeim vinsælustu í klámi (gjarnan merkt sem stjúpfjölskyldur til að brjóta ekki lög). Þetta sendir afar skökk og hættuleg skilaboð til þeirra áhorfenda sem líta á klám sem uppsprettu þekkingar um kynlíf. Munum að líklegt er að klámfræðsla virki fyrirbyggjandi þegar kemur að mögulegum kynferðisbrotum í framtíðinni, ef við kennum krökkum snemma að gagnrýna efni sem fléttar saman kynlíf og ofbeldi á varasaman hátt.

Klámframleiðsla

Ljóst er að mansal, ofbeldi og önnur ósiðleg og ólögleg iðja fylgir klámbransanum, enda eru netheimar gríðarstórir og mikið til óritskoðaðir. Jafnvel stórar, viðurkenndar klámveitur hafa löngum fullyrt að ekki sé gerlegt að greina glæpsamlegt og ofbeldisfullt efni frá annars konar klámefni, og því litlar sem engar síur á slíkum síðum. Fyrir notandann er því engin leið að vita hvort klámið er í raun leikið og með sönnu samþykki allra aðilanna, eða hvort þeir eru t.d. undir lögaldri, beittir raunverulegu ofbeldi í mynd, eða myndefninu dreift í óþökk manneskjunnar á því (stafrænt kynferðisofbeldi).

Klámneytandi getur því vel tekið þátt í að búa til efnahagslegan hvata fyrir slíka glæpi, þótt hann hafi ekki áhuga á því. Spurðu unglinginn í einlægni hvort hann geti hugsað sér að styðja slíkan bransa.