Sjúkást 2026: Ertu í suði?24. mars 2026

Átta stutt myndbönd hafa verið útbúin sem sýna ólíkar birtingamyndir suðs og hvernig hægt er að vera frekar í stuði, ásamt umræðum um samskipti. Halldóra Geirharðsdóttir leikur og leikstýrir efninu og kom hún einnig að handritsgerðinni, en handritið er skrifað af Snæbirni Ragnarssyni út frá efni og reynslu af Sjúktspjall. Ásamt Halldóru leika Björk Guðmundsdóttir og Fannar Arnarsson.

Hvað er Sjúkást?
Sjúk ást er fræðslu- og forvarnaverkefni fyrir ungt fólk gegn kynferðisofbeldi á vegum Stígamóta. Markmið verkefnisins er að fræða ungmenni um mörk, samþykki og heilbrigð sambönd með það að leiðarljósi að koma í veg fyrir kynferðisofbeldi áður en það er framið.

Sjúktspjall er nafnlaust netspjall fyrir ungmenni 25 ára og yngri þar sem þau geta leitað ráðgjafar fagaðila um sambönd, samskipti og ofbeldi. Spjallið opnaði í mars 2022, en helstu þemu sem koma í gegnum spjöllin eru kynferðisofbeldi, meðvirkni og óöryggi, kynfræðsla og óheilbrigð sambönd. Sjúktspjall er opið mánudaga, þriðjudaga og miðvikudaga frá kl. 20-22 og má finna á www.sjukast.is.