Sálfélagslegt áhættumat: Niðurstöður greiningar á starfsumhverfi Stígamóta21. júlí 2017

Stjórn og starfshópur Stígamóta hafa tekið umræðu um neikvæða starfsupplifun af fyllstu alvöru en í kjölfar hennar var leitað til vinnustaðasálfræðinga, vinnustaðalögfræðinga og Vinnueftirlitsins. Ákveðið var að ráðleggingum þeirra um fagleg viðbrögð yrði fylgt í einu og öllu.

SKRUNAÐU

Stjórn og starfshópur Stígamóta hafa tekið umræðu um neikvæða starfsupplifun af fyllstu alvöru en í kjölfar hennar var leitað til vinnustaðasálfræðinga, vinnustaðalögfræðinga og Vinnueftirlitsins. Ákveðið var að ráðleggingum þeirra um fagleg viðbrögð yrði fylgt í einu og öllu.

Fyrirtæki Ólafs Þórs Ævarssonar geðlæknis, Forvarnir, sem hefur réttindi frá Vinnueftirlitinu til að gera sálfélagslegt áhættumat, var í kjölfarið fengið til að greina ástandið á vinnustaðnum. Talskona Stígamóta vék til hliðar á meðan matið fór fram.

Niðurstöður Forvarna liggja nú fyrir en þær gefa til kynna að samstaða, sveigjanleiki og góður starfsandi einkenni vinnuumhverfið hjá Stígamótum. Eftirfarandi flokkar voru kannaðir: Starfsálag; stjórnun; ofbeldi; samskipti og starfsandi; einkalíf; sveigjanleiki; og streita. Spurningarnar voru að hluta til staðlaðar samkvæmt þeim þáttum sem Vinnueftirlit ríkisins hefur mælt með en að auki voru lagðir fyrir spurningalistar sem meta ítarlegar andlega líðan, samskipti, stjórnun og streitu. Allt starfsfólk Stígamóta tók þátt í ferlinu en upplýsingar voru ónafngreindar og öruggt að þær væru ekki persónugreinanlegar í úrvinnsluferlinu. Þetta tryggir trúnað og kemur í veg fyrir þöggun.

Í samantekt á niðurstöðum matsins má lesa eftirfarandi:

„Í sálfélagslega matinu kemur fram að starfsmenn búa við talsvert starfsálag en virðast ráða vel við það og hafa góðan stuðning. Stjórnun er skýr og starfsmenn öruggir um sig. Engar vísbendingar komu fram um ofbeldi á vinnustað eins og einelti eða kynferðislega áreitni. Samskipti virðast vera með góðu móti og stuðningur í starfi er góður. Samræming einkalífs og starfs er hugleikin starfsfólki og það þarf að hafa fyrir jafnvægi á milli starfs og einkalífs sem þeim þó virðist takast ágætlega að tileinka sér. Starfsmenn njóta handleiðslu í hópi og hefur þetta vafalítið góð áhrif. Góður sveigjanleiki er í starfi fyrir starfsmenn. Streita er til staðar og stundum líka álag heima fyrir en þetta virðist ekki hafa farið úr böndum hjá neinum starfsmanni og ekki verður vart við sjúkleg streitueinkenni hjá neinum starfsmanni.”

Guðrún Jónsdóttir tekur við hlutverki talskonu á ný

Í ljósi þessara niðurstaðna þykir stjórn Stígamóta yfir allan vafa hafið að traust, trúnaður og starfsánægja ríki meðal starfsfólks Stígamóta. Ekkert gaf til kynna að einn eða fleiri starfsmenn sýndu samstarfsfólki sínu óviðeigandi hegðun, ráðríki eða yfirgang. Í framhaldinu óskaði stjórn Stígamóta í samráði við starfshópinn eftir því að Guðrún Jónsdóttir tæki við hlutverki talskonu á ný. Samþykkti Guðrún að verða við því.

Sálfélagslega áhættumatinu fylgja tillögur um hvernig matið geti nýst við eflingu starfsumhverfisins á Stígamótum. Ein þeirra snýr að því að gerð verði forvarnaáætlun samkvæmt lögum um vinnuvernd. Hún innihaldi fræðslu um streitu, forvarnir, samskipti, einelti og kynferðislega áreitni ásamt skýrum leiðbeiningum um viðbrögð komi slíkt upp. Vinna er hafin við gerð forvarnaáætlunarinnar og er áætlað að henni ljúki innan tveggja vikna. Stjórn og starfshópur Stígamóta fagna niðurstöðum úttektarinnar en það er alltaf hægt að gera betur. Við lítum á matið sem góðan grunn til að viðhalda og efla heilbrigt starfsumhverfi á Stígamótum.

Skýrsluna í heild sinni má lesa hér.

Fleiri greinar

Hafa samband

Netspjall Stígamóta

Hér getur þú spjallað við ráðgjafa hjá Stígamótum.

Senda fyrirspurn

Ef þú hefur einhverjar spurningar ekki hika við að senda okkur línu.

Panta tíma

Það er aldrei of seint. Pantaðu tíma núna.

Hafa Samband möguleikar Stígamót