Hver ber ábyrgð á kynferðisofbeldi?24. júlí 2014

Hjá Stígamótum leggjum við ríka áherslu á að uppræta skaðlegar staðalímyndir sem tengjast kynferðisofbeldi. Til þess að fyrirbyggja ofbeldi og til þess að takast á við afleiðingar þess, þarf að hafa skilning á fyrirbærinu og heildarsýn í huga. Enn má sjá ríka tilheigingu til þess að gera lítið úr þætti ofbeldismanna og réttlæta hegðun þeirra með tilvísun í hegðun brotaþola. Ósýnileiki og þöggun gegna svipuðu hlutverki og má sjá mýmörg dæmi um slíkt í bæði tali og myndefni í fræðslu. Úr þessu verður að bæta ef létta á ábyrgðinni af brotaþolum og losa þá við órökrétta skömm og sektarkennd.

Næstkomandi laugardag verður Druslugangan haldin í fjórða skiptið. Gengið verður frá Hallgrímskirkju kl. 14:00 og niður á Austurvöll. Hugmyndin að baki Druslugöngunnar er að færa ábyrgð kynferðisglæpa frá brotaþolum yfir á þá sem beita kynferðisofbeldi og skila þar með skömminni sem svo margir brotaþolar upplifa aftur þangað sem hún á heima. 

Hér er myndband með Reykjavíkurdætrum, Halldóri Eldjárn og Ásdísi Maríu þar sem stungið er á þessu kýli samfélagsins:
http://infront.is/myndbond/islenskar-druslur/