Hjálmar M. Sigmarsson nýr starfsmaður Stígamóta1. apríl 2014

Það er með mikilli ánægju sem við tilkynnum að Hjálmar Minić Sigmarsson hefur verið ráðinn til starfa hjá Stígamótum. Hjálmar hefur í mörg ár beitt sér í baráttunni gegn kynferðisofbeldi m.a. í Feministafélagi Íslands og sérstaklega í Nei hópnum. Hann hefur unnið hjá UN Women og á Jafnréttisstofu og hann er að ljúka meistaragráðu í kynjafræði á Spáni.

Það er sannarlega kominn tími til þess að starfshópur Stígamóta endurspegli þá staðreynd að 18% þeirra sem leituðu hjálpar hjá okkur árið 2013 voru karlar.

Hjálmar mun taka þátt í fræðslustarfi með sérstakri áherslu á aðkomu karla að ofbeldi, en hann mun einnig sinna ráðgjöf eins og annað starfsfólk. Hann tekur til starfa þegar hann kemur heim í sumar. Starfssystur hans geta varla beðið og bjóða hann velkominn í hópinn.